Ресейлік "Голос Дети" сайысының 2-орын иегері, отандасымыз Ержан Максимді Димаш Құдайберген жеңімпаз деп атап, нағыз джентельменге теңеді, деп хабарлайды Elitar.kz.
Ержан Максим "Голос Дети" шоуындағы ақтық сында 27,9 балмен екінші орын иеленді. Ресейдің эстрада жұлдызы Алсудың қызы Микелла Абрамова 56,5 пайызбен жеңіске жетті.
Шоу көрерменнің көңілінен шыққан жоқ. Ресей жұлжыздарымен қатар, қарапайым көрермен де шоудың әділетсіз өткенін айтып, Ержан Максимді нағыз жеңімпаз деп атады.
Әлемге танымал қазақстандық әнші Димаш Құдайберген инстаграмдағы өз парақшасында Ержан Максимге қолдау білдіріп, әсерлі жазба қалдырды.
"Бауырсақ бала! Сенің финалда көрсеткен өнеріңді тамашалап шықтым. Қазағымның бағына біткен баласың. Жеңісің құтты болсын, Ержантай! Алар асуларың көп болсын. 100 млн-нан астам халықтың арасынан 2-орын алу деген өте үлкен жетістік. Бірінші орынды қыз балаға жігіттік танытып бере салғаның да дұрыс болды! Барлық қатысқан бүлдіршіндерді құттықтаймын. Бірақ мен үшін Ержантай жеңімпаз!",-деп жазды Димаш Құдайберген.
