11 ақпан, 16:14
Әнші Төреғали Төреәлі Шымкентте концерт қойғалы келе жатыр. Өнерпаз 8 наурыз күні құттықтау бағдарламасын ұсынбақ.
Төреғали тек әндерімен ғана емес, дау-жанжалдарымен де аты шығып жүр. Өзінің концерттерінің бірінде ол залдан қария кісіні шығарып жіберген соң халықтың сынына ұшырады. Тыңдарман қауым Төрағалидің бұл қылығына қатты ашынды. Халық әншінің әлеуметтік желідегі парақшасында сын пікірлер қалдырып қана қоймай, оның концерттеріне де барудан бас тартты.
Айта кетейік, жұлдызды жігіттің Шымкенттегі БАҚ өкілдерімен де келіспей қалғаны бар. Тоқыма фабрикасына шақырылған өнерпаз кездесуге кешігіп келді. Бейнекамераның алдында басқаша тұруын өтінген тілшіге дөрекі жауап берді. Төреғали өтінішті орындамағанымен қоймай, ары қарай интервью беруден бас тартты. Сол келіспеушіліктің видеосы желіде тарап кетеді. Бұл оқиғаның әртістің есінде қалғаны соншалық, ол, тіпті, кино түсірмек болады.
«Ұлы дала комедиясы» әнші Төреғали Төреәлінің өзі туралы. Сценарий бойынша журналист қызбен келіспей қалған әнші өткір сынның астында қалады. Жұлдызды өмірден біраз шаршаған Төреғали бір күні қарапайым адам болып оянады. Енді оның өмірі ешкімге қызық емес, ал стадион толы көрермен басқа әншінің концертіне барып жүр. Әртістің тыныш өмірді қалаған арманы орындалып, шығармашылыққа деген махаббаты өзгеріссіз қалады.
Төреғали өзінің мінезімен аты дау-жанжалға ілігіп қана қоймай, түсірген киносы арқылы қаржы табуды көздесе керек. Енді 8 наурыздағы концерті көңілінен шыға ма, оны уақыт көрсетеді.
