28 ақпан, 17:20
Шаңғы жарысы бойынша Қазақстан құрамасының көшбасшысы Алексей Полторанинге тыйым салынған заттар қолданды деген айып тағылып отыр. Төрт рет қысқы Олимпиада ойындарына қатысқан спортшы Австрияның Зеефельд қаласында допингпен күреске бағытталған Aderlass арнайы операциясы барысында ұсталды.
SSS.fi мәліметі бойынша, арнайы операция барысында 5 спортшы ұсталды: Австрияның екі атлеті, екі эстондық пен бір қазақстандық шаңғышы. Аты-жөндері аталған спортшылардың қатарында біздің шаңғышы Алексей Полторанин де бар.
Бұған қоса мәлім болғаны, Полторанин әлем чемпионатындағы өзінің «сүйікті» қашықтығына дәл осы себеппен шықпаған. Спорт және дене шынықтыру комитетінің төрағасы Серік Сапиев қазақстандық шаңғышы әлемдік біріншіліктің алтын медалінен үмітті еді дегенді айтады.
«Менің ойымша, Полторанин тергеу абақтысында отыр. Осындай болжамым бар. Қандай жағдайда отырғанынан нақты ақпарат жоқ, оны ұстап алған және қамауда отыр», - деді болжамымен бөліскен Серік Сәпиев.
Серік Сәпиев бұған қоса Полтораниннің жанында қазіргі таңда оның адвокаты бар екенін айтты. Қазақстан құрамасының бапкерлік штабы, еліміздің ҰОК, Шаңғы жарысы федерациясы мен Шаңғы спорты түрлері қауымдастығының өкілдері де Австрияда жүр.
