13 наурыз, 10:23
Ресейдің Красноярск қаласында Дүниежүзілік қысқы Универсиада аяқталды, деп жазады Elitar.kz.
Қазақстандық студенттер 7 медаль ұтып алды. Біздің студенттердің қоржынында бірде-бір алтын жоқ, ұлттық құрама жалпы есепте 17-сатыға тұрақтады.
Салыстыру үшін айта кетсек, Алматыда 2017 жылы өткен Универсиадада жерлестеріміз 36 медаль жеңіп алған болатын, оның 11-і алтын еді. Қазақстан құрамасы жалпы командалық есепте екінші орын алған. Ал Универсиада-2015 сайысында студент-спортшылар 11 медаль ұтып алып, жалпы есепте 11-орыннан көрінген.
2019 жылы қазақстандық спортшылар 4 күміс, 3 қола жүлде алды. Екінші орын алғандар: Павел Колмаков (фристайл могул), Әсет Дүйсенов (шаңғы жарысы), шаңғы жарысынан ҚР ерлер құрамасы және Элизабет Тұрсынбаева (мәнерлеп сырғанау). Ал Жанбота Алдабергенова (фристайл акробатика), сондай-ақ, шорт-тректен ерлер мен қыздар құрамасы эстафетадан екінші орын алды.
Қазақстан құрамасының сапына Шымкенттен 5 спортшы енді. Олардың арасынан Аяна Жолдас үздік нәтиже көрсеткен. Фристайл (акробатика) финалында бойжеткен жүлдеден мүлт кетіп, 4-орын алды. Осы сайыста Илдар Батрутдинов, Нұрлан Батырбаев пен Маржан Ақжігіт Студенттер ойындарының финалдық сынына өте алған жоқ. Шорт-трек жарысында Нұрлыбек Бейсеев 1,5 шақырымда 19-шы болып келді.
