«Suleimen Promotions» компаниясының барлық ұжымы Айдос Ербосынұлының жағдайына алаңдаулы және денсаулығына күнделікті бақылау жасауда. Біздің қайтпас қайсар батырымыз біз үшін кәсіпқой бокстағы «ең үздік» болып қала бермек.
Қазір Айдос Минеаполис қаласындағы үздік клиникалардың біріне жатқызылды. Дәрігерлердің сөзінше, жағдайы бірқалыпты, біз оның денсаулығы жақсаратынына сенімдіміз.
Спортшымыздың емделуіне жұмсалатын барлық шығындарды ұйымдастырушы компания өз мойнына алды. Сондай-ақ, Айдостың жауынгерлік рухын көтеру мен өзін жақсырақ сезінуі мақсатында Қазақстандағы жақындарын АҚШ-қа алтырту жолында жұмыстар жүргізіліп жатқанын айтып кеткіміз келеді.
Әрине, спорттың қай түрінде де, соның ішінде кәсіпқой бокста жарақат алу қауіпі жоғары. Алайда біз кез-келген жағдайда Айдос Ербосынұлының денсаулығы қалпына келуі үшін барлық көмекті көрсетететін боламыз.
Бұған дейін қазақстандық боксшы Айдос Ербосынұлының кубалық Давид Моррельден нокаутпен жеңіліп, медициналық комаға түскені туралы хабарланған болатын.
WBA Regular титулы үшін жекпе-жек 6 қарашада Миннеаполисте өтіп, кубалық боксшының 12-ші раундта мерзімінен бұрын жеңісімен аяқталды.
Айдос Ербосынұлы рингке шықпағанына бір жылдан асты: 2021 жылдың қыркүйегінде Астанада Гайандық Леннокс Алленмен (22-2-1, 14 КО) жұдырықтасып, оны 10-раундта нокаутқа жіберген.
