19 қараша, 15:24
Алматы қаласындағы Балуан Шолақ атындағы спорт сарайында грек-рим күресінен XXIV халықаралық Б.Тұрлыхановтың кубогі жолындағы жарыс аяқталды.
Айта кетейік, Б.Тұрлыхановтың кубогі турниріне тек Қазақстанның мықтылары ғана емес, қазіргі Азия, Еуропа, Әлем және Олимпиада чемпиондары жиналды. Турнирдегі бәсекелестік мықты болғандықтан, алтын медаль иегерлері де әлемнің әр түкпірінен шығып жатады.
Жылдағы дәстүр бойынша Кубокқа әлем күресінің аңыздары, құрметті қонақтар – Олимпиада чемпионы Жақсылық Үшкемпіров, Ресей Қаһарманы, үш дүркін Олимпиада чемпионы Александр Карелин, Әлем, Еуропа және Олимпиада ойындарының чемпиондары Левон Джулфалакян (Армения), Камандар Маджидов және Сергей Демяшкевич (Беларусь), Азия күрес федерациясы Атқару комитетінің мүшелері, Францияның күрес федерациясының өкілдері және алыс-жақын шетелдерден басқа да әйгілі спортшылар келді.
Жарыс олимпиадалық алты санат бойынша өтті. Жарыстың екі күнінің қорытындысы бойынша финалға Қазақстаннан тек шымкенттік Әділхан Сатаев қана шықты. 67 келіге дейінгі палуандар арасындағы ақтық бәсекеде Әділхан биылғы Ресей чемпионы Заур Кабалоевтан басым түсті. Шымкенттің тағы бір палуаны Әлімхан Сыздықов (97 кг) қола жүлдеге қол жеткізді.
ФОТО: wrestling.kz
Автор:
Татьяна Дроздова
