Конгодан табылған эбола ошағы Мбандакеде енді дәрігерлер жаңа вакцинацияны сынақтан өткізеді. Өлім қаупі бар вирусты тоқтату үшін бұл екпе адамдарға бүгін салына бастады
Мбандаке медицина қызметкерлері осы екпені алғаш өздеріне салып, сынақтан өткізеді. 1,2 миллион халқы бар Конго демократиялық республикасында пайда болған эбола ошағын тез арада жою көзделген дейді Дүниежүзілік денсаулық сақтау ұйымының өкілі Тарик Яшаревич.
Өткен аптада эбола вирусы анықталып, тез таралып кеткен дерт тұрғындардың үрейін ұшырды. Әзірге осы вирус салдарынан 26 адам көз жұмған.
rVSV-ZEBOV деп аталатын екпе бірінші рет 8-10 мың адамға бірден салынады. Бұл туралы Дүниежүзілік денсаулық сақтау ұйымының өкілі Питер Салама жеткізді. Ол эбола вирусы анықталған адамдармен қарым-қатынаста болған жандарға салынады.
Эбола қазіргі таңда емделуге көнбейтін, тез жұғатын ауру түрі ретінде танылып отыр. Оны жұқтырған адам 2-21 күн аралығында шаршап, бұлшық еттері ауырып, әлсіздік сезініп, құсады дейді дәрігерлер. Кей жағдайда дертті жұқтырған адамның іші өтіп, бауыры мен бүйрегі ауырады. Тіпті, ішкі органдарда қан кетуі ықтимал екен.
Еске сала кетейік, 2014 жылы Батыс Африкада эбола ошағы анықталып, бірнеше айда 11 000 адам көз жұмған болатын.
Ал rVSV-ZEBOV екпесі Гвинеядағы эболаны жұқтырған адамдармен қарым-қатынаста болған тұрғындарға 2015, 2016 жылдары салынып, дәрігерлер оң нәтижеге қол жеткізген еді.
АҚШ аллергия және инфекциялық аурулар Ұлттық институтының дәрігері Энтони Фаучидің айтуынша, бұл жолы аталған екпе тек эболаны жұқтырған жандармен қарым-қатынаста болғандарға ғана емес, ауру адамдардың өздеріне де салынады.
Конго демократиялық республикасының астанасы Киншас қаласын мекендейтін 5 мың адамға Дүниежүзілік денсаулық сақтау ұйымы бұл екпені салып үлгерді. Енді мың адам кезекте тұр деген хабар келді.
Геморрой белгілері бар бұл ауру 46 адамда анықталды, оның 21-і эбола вирусы деп танылды.
Дүниежүзілік денсаулық сақтау ұйымы Мбандакеде тағы бір ауру жұқтырған адам анықталды деп хабарлады. Конго Денсаулық сақтау министрі Илунга Каленганың айтуынша, тағы бір ауру жұқтырған адамның анықталғаны вирусты әлі де болса тоқтата алмай отырғандарын білдіреді.
Конгоға көрші орналасқан 9 мемлекетте қауіпті жағдай жарияланды. Сондықтан тұрғындарға аса сақ болу туралы ескерту жасалды.
Дүниежүзілік денсаулық сақтау ұйымының бас директоры Тедрос Адханом Гебрейесус бүгін жыл сайын өткізілетін Денсаулық сақтау дүниежүзілік ассамблеясында сөз сөйлеп, осы мәселені талқыға салады деп болжанған.
АҚШ Халықаралық даму агенттігі Конгодағы эбола ошағын жоюға 1 миллион доллар қаражат бөлді.
