Apple инженерлері айфонның басты пробламасының бірі – смартфонның аязда өшіп қалу мәселесін шешті. Компанияның жаңалығы енді телефонның үскірік аязда да жұмыс істеуіне сеп болмақ. 2019 жылы жаңа iPhone смартфондарына өте төмен температурада жұмыс істей алатындай жаңа батареялар орнатылмақ, деп хабарлайды Elitar.kz.
Анық болғаны, Apple инженерлері қосымша қабаты бар аккумуляторларды құрастырудың жаңа әдісін ойлап тапқан. Соның нәтижесінде батарея сыртқы әсерге төзімді болып, төмен температурада да жұмыс істей алады. Әрине, заманауи аккумуляторларда қорғаныш қабаты қарастырылған, дегенмен климаты әлдеқайда суық солтүстік өңірлерде жұмыс істеу жайты ескерілмеген. Енді қосымша қорғаныш қабаты құрылғының өздігінен өшіп қалуының алдын алып, қуаттағыштағы химиялық реакцияларға қажет жұмыс температурасын қамтамасыз етеді.
Apple компаниясы бұған дейін 2 жыл және одан бұрын шығарылған құрылғыларда аккумуляторлардың сыйымдылығы төмендеп кету проблемасын шешу үшін iOS бағдарламасының 10.2.1 нұсқасында процессордың жұмыс жиілігін бағдарламалық төмендету әдісін қолданып көрген. Бұл шешім айфондардың жұмысын баяулатып, тұтынушылар тарапынан дау-дамайға ұласты. Енді 2019 жылы жаңа iPhone смартфондарға өте төмен температурада жұмыс істей алатын мүлде жаңа батареялар орнатылмақ.
