Зеленскийдің 2018 жылғы табысы жария етілді

22 мамыр, 12:30

Владимир Зеленскийдің ұлықтау рәсімі өте салысымен жемқорлыққа қарсы іс-қимыл агенттігінің ресми сайтында Украинаның жаңа Президентінің өткен жылғы табысы туралы мәлімет жария етілді. Украиндық "Сегодня" сайты бұл мәліметті Президенттің 2017 жылғы табыс декларациясымен салыстырып, зерделеп шықты. Айта кетейік, Зеленский 2017 жылғы табысы туралы мәліметті президенттікке кандидат ретінде тіркелген кезінде Орталық сайлау комиссиясына берген болатын.

Зеленскийдің табысы 2018 жылы - 9,7 млн гривен (371 мың АҚШ доллары), ал оның әйелінің табысы бұл жылы 4,9 млн гривенді (187 мың АҚШ доллары) құраған.

Яғни, Президенттің табысы бір жылда 2,35 млн грн-ға артты. Себебі 2017 жылы ол 7,3 млн грн табыс тапқан. Табыстың бұлайша артуына жалақының 1,5 млн грн-нен 4,1 млн грн-ға дейін өсуіне байланысты қол жеткізіліпті. Бірінші ханымның жалақысы 148 мың грн-нен 1,1 млн грн-ға дейін өсті. Өзгерістер жылжымайтын мүлік тізімінде де бар. Өткен жылы Владимир Зеленский декларациясында Италиядағы тұрғын үй пайда болды. Оның көлемі - 413 шаршы метр, ал бағасы - 88,5 млн грн. Бірақ үй Италияда тіркелген San Tommaso S. R. L. компаниясына тиесілі. Бұл компания Зеленский мен оның әйеліне тиесілі заңды тұлғалар тізімінде көрсетілген.

Италиялық кәсіпорындардан басқа Президент декларациясында Украинада, Белизде және Кипрде тіркелген тағы 7 компания көрсетілген. Ал 2017 жылғы есепте көрсетілген Megiritano Ventures Ltd компаниясы (Британдық Вергин аралдары) бұл жолы тізімде болмады.

Өткен жылы Президент меншігінде құрылысы аяқталмаған нысандар пайда болған. Бұл Грузиядағы бес нөмірлі қонақ үй болып табылады. Сонымен қатар декларация тізімінде сауда маркаларына, пайдалы модельдерге және өнертабыстарға берілген 39 патент көрсетілген.

Тегтер: Әлем жаңалықтары