Forbes журналы Youtube-тегі ең табысты блогерлердің тізімін жасап шығарды, деп жазады РИА Новостиге сілтеме жасай отырып Elitar.kz.
Үздіктер тізімінің көшін 7 жастағы балақай Райан бастап тұр. Ол ата-анасымен бірге Ryan Toys Review каналын жүргізіп отырады. Аталған каналда түрлі ойыншықтардың топтамасы көрерменге ұсынылуда. Жас блогердің каналына 17 млн-нан астам оқырман жазылған. Оның ғаламторға жүктеген видеоларының қаралымы 26 млрд-ты құрайды. Бір жылда Райанның Youtube арқылы тапқан табысы 22 миллиона долларға жеткен.
Екінші орынға Джейк Пол орнықты. Оның да 17 миллионнан астам жазылушысы бар. Ол музыкалық және комедиялық жанрдағы видеоларымен бөлісіп отырады. Джейк Полдың жылдық табысы 21 миллионнан астам долларды құраған.
Үшінші орын Dude Perfect командасына бұйырған. Бес адам жүргізіп отыратын канал жылына 20 миллион доллар табыс тапқан. Айтпақшы, бес достың ортақ каналында түрлі лайфхактарды көруге болды. Каналдың шамамен 37 миллион жазылушысы бар.
Өткен жылы табысты блогерлердің көшін бастаған блогер Дэниел Миддлтон биыл төртінші орынды қанағат тұтыпты. Британдық компьютерлі ойындардың құрастырушысы DanTDM каналын жүргізіп отырады. Оның шамамен 21 миллион оқырманы бар. Бір жылда ол 18 миллион доллар табыс тапқан.
Американдық стилист әрі модель, музыкант Джеффри Стар бесінші орынға тұрақтады. Оның каналын 11 млн-нан оқырман бақылап отырады. Жылдық табысы - 18 миллион АҚШ доллары.
Табысты блогерлердің үздік ондығына Markiplier, Vanoss Gaming, Jacksepticeye, PewDiePie жәнеLogan Paul каналдары да енген. Атап өтерлігі, Forbes журналы бұл тізімді блогерлердің 2017 жылдың маусымы мен 2018 жылдың маусымы аралығында тапқан табысын ескере отырып түзген. Көрсетілген сома салық төлемдерінсіз есепке алынған.
ФОТО: marketeers.com
